ઢાકા: બાંગ્લાદેશ સરકારે હવે ખાંડ સહિતની નવ કોમોડિટીની કિંમત નક્કી કરવાનો નિર્ણય લીધો છે, જેથી તેમની વધતી કિંમતોને કાબૂમાં લેવામાં આવે, જોકે કિંમતો પર લગામ લગાવવાના વારંવારના પ્રયાસો નિરર્થક ગયા છે. વાણિજ્ય પ્રધાન ટીપુ મુનશીએ તેમના મંત્રાલયમાં સંબંધિત મંત્રાલયો, વિભાગો, કાયદા અમલીકરણ એજન્સીઓના પ્રતિનિધિઓ અને વેપારી નેતાઓ સાથેની બેઠક બાદ આ નિર્ણયની જાહેરાત કરી હતી. મંત્રી મુનશીએ જણાવ્યું હતું કે સ્થાનિક બજારમાં કેટલીક ચીજવસ્તુઓના ભાવમાં ધરખમ વધારો થયો છે કારણ કે ડોલરના ભાવમાં થયેલા વધારાનો લાભ વેપારીઓ ઉઠાવી રહ્યા છે.
મંત્રી ટીપુ મુનશીએ જણાવ્યું હતું કે, બાંગ્લાદેશ વેપાર અને ટેરિફ કમિશન આંતરરાષ્ટ્રીય બજારનું મૂલ્યાંકન કરશે અને તે નિયમિત ધોરણે સ્થાનિક બજારમાં આવશ્યક ચીજવસ્તુઓની વાજબી કિંમત નક્કી કરશે. તમામ વેપારીઓએ ભાવનું પાલન કરવું પડશે, અન્યથા તેઓ કાનૂની કાર્યવાહીનો સામનો કરશે. તેમણે કહ્યું કે તાજેતરમાં ખાંડના ભાવમાં અયોગ્ય વધારો જોવા મળ્યો હતો. દરમિયાન, સરકારે વિવિધ બજારોમાં અનેક દરોડા પણ પાડ્યા હતા પરંતુ કિંમતો પર કોઈ અસર થઈ ન હતી. છેલ્લા એક મહિનામાં ખાંડના ભાવમાં લગભગ 10 ટકાનો વધારો થયો છે.
