મુંબઈમાં ભારે વરસાદને કારણે જનજીવન અસ્તવ્યસ્ત થઈ ગયું છે. હવામાન વિભાગ (IMD)એ મુંબઈમાં વરસાદને કારણે ઓરેન્જ એલર્ટ જાહેર કર્યું છે. સમગ્ર શહેરમાં ટ્રેન અને બસ સેવાને માઠી અસર થઈ છે. કુર્લા, ચેમ્બુર, સાયન, દાદર અને અંધેરી સહિત મુંબઈના ઘણા ભાગોમાં ભારે વરસાદ પડ્યો હતો.
એક અધિકારીએ જણાવ્યું કે હવામાન વિભાગ (IMD) એ ઓરેન્જ ચેતવણી સાથે યલો એલર્ટ જારી કર્યું છે, જેમાં 1 અને 2 જુલાઈએ શહેરના કેટલાક સ્થળોએ ભારે વરસાદની આગાહી કરવામાં આવી છે. મ્યુનિસિપલ અધિકારીઓએ જણાવ્યું હતું કે સિઝનના પ્રથમ ભારે વરસાદને કારણે ગુરુવારે ઘણા નીચાણવાળા વિસ્તારોમાં પાણી ભરાઈ ગયા હતા.
હિંદમાતા, પરેલ, કાલાચોકી, હાજી અલી, ડોકયાર્ડ રોડ, ગાંધી માર્કેટ અને બાંદ્રા જેવા વિસ્તારમાં, ઘણા રસ્તાઓ પર પાણી ભરાઈ જવાને કારણે રોડ ટ્રાફિક કાં તો ધીમો પડી ગયો અથવા બંધ થઈ ગયો. પાણીના ભારે પ્રવાહ અને પૂરના કારણે BMCએ અંધેરી મેટ્રોને પશ્ચિમી ઉપનગરોમાં ટ્રાફિક માટે બંધ કરી દીધી હતી.
ભારે વરસાદને કારણે અનેક વિસ્તારોમાં પાણી ભરાઈ ગયા હતા. ઘણી જગ્યાએ લોકો ઘૂંટણિયે પાણીથી પસાર થતા જોવા મળ્યા હતા અને ઘણા વાહનચાલકો કલાકો સુધી જામમાં અટવાયા હતા. સત્તાવાર માહિતી અનુસાર, ગુરુવારે સવારે 8 વાગ્યાથી સાંજના 8 વાગ્યા સુધીમાં શહેરમાં 119.09 મિમી, પશ્ચિમ ઉપનગરોમાં 78.69 મિમી અને પૂર્વ ઉપનગરોમાં 58.40 મિમી વરસાદ નોંધાયો હતો.
શહેરમાં અવિરત વરસાદ વચ્ચે કાલબાદેવી અને સાયન વિસ્તારમાં મકાન ધરાશાયી થવાની બે ઘટનાઓ બની છે. જો કે અધિકારીઓએ માહિતી આપી છે કે આ ઘટનાને કારણે કોઈને ઈજા થઈ નથી. લોકોને સુરક્ષિત રીતે બહાર કાઢવામાં આવ્યા છે.
