पुणे : यंदा बदलत्या हवामानामुळे आणि अनियमित पावसामुळे जुलैमध्येच ऊस पिकावर लोकरी मावा किडीचा प्रादुर्भाव झाला आहे. या किडीमुळे उत्पादनात सुमारे वीस टक्के होण्याची शक्यता शेतकऱ्यांनी व्यक्त केली आहे. इंदापूर आणि बारामती तालुक्यातील काही भागांमध्ये किडीचा फैलाव अधिक आहे. शेतकऱ्यांनी या किडीच्या नियंत्रणासाठी एकात्मिक कीड व्यवस्थापन पद्धती अवलंबावी. बाधित शेतातील बेणे लागवडीसाठी वापरू नये. प्रादुर्भावग्रस्त पाने आणि पाचट काढून जाळावे. जैविक नियंत्रण करावे, असे आवाहन कृषी तज्ज्ञांनी केले आहे.
लोकरी मावा किडीची पिल्ले आणि प्रौढ अवस्था पिकाला सर्वाधिक नुकसान पोहोचवते. ही कीड पानाच्या खालच्या बाजूस राहून रस शोषते, ज्यामुळे पाने पिवळी पडतात, वाळतात आणि ठिसूळ होतात. रस शोषण करणारी कीड ऊस, ज्वारी आणि बाजरी आदी पिकांवर उपजीविका करते. साधारणपणे पावसाळा संपल्यानंतर, म्हणजेच ऑक्टोबरपासून उन्हाळ्यापर्यंत या किडीचा प्रादुर्भाव जास्त दिसतो. परंतु, यंदा पावसाळ्यातच याचा फैलाव झाला आहे. सध्या इंदापूर आणि परिसरात खोडवा पिकावर या किडीचा प्रादुर्भाव जास्त दिसत आहे. शेतकऱ्यांनी आपल्या शेतातील उसाची नियमित पाहणी करावी. किडीची सुरुवातीची लक्षणे, दिसल्यास तत्काळ उपाययोजना करावी, प्रादुर्भाव आढळून आल्या शेतातील पाण्याचा निचरा करावा. लागवडीसाठी रोगग्रस्त शेतातील ऊस वापरू नये असे आवाहन काटेवाडीचे सहाय्यक कृषी अधिकारी वाय. जे. सांगळे यांनी केले आहे.
