સ્વિટ્ઝર્લૅન્ડના દાવોસમાં ચાલી રહેલા વર્લ્ડ ઇકોનોમિક ફોરમ દરમિયાન, યુએસ પ્રમુખ ડોનાલ્ડ ટ્રમ્પે વૈશ્વિક મુદ્દાઓ તેમજ ભારત-અમેરિકા સંબંધો વિશે ખુલ્લેઆમ વાત કરી. તેમના સંબોધન પછી, ટ્રમ્પે ભારતીય મીડિયા સાથે વાત કરી, બંને દેશો વચ્ચેના પ્રસ્તાવિત વેપાર કરાર વિશે માહિતી આપી.
આ વાતચીત દરમિયાન, ટ્રમ્પે વડા પ્રધાન નરેન્દ્ર મોદીની પ્રશંસા કરી અને ભારત સાથે આર્થિક ભાગીદારીને મજબૂત બનાવવાનો સંકેત આપ્યો. તેમણે કહ્યું, “પીએમ મોદી એક અદ્ભુત વ્યક્તિ અને મારા મિત્ર છે. અમે ભારત સાથે સારો સોદો કરીશું.”
ભારત-અમેરિકા વેપાર કરાર પર સકારાત્મક વલણ
ડાવોસમાં ચાલી રહેલા વર્લ્ડ ઇકોનોમિક ફોરમ દરમિયાન, ટ્રમ્પે ભારત-અમેરિકા વેપાર કરાર અંગે સકારાત્મક લાગણીઓ વ્યક્ત કરી. ભારત અને અમેરિકા વચ્ચે પ્રસ્તાવિત દ્વિપક્ષીય વેપાર કરાર પર પહેલી ઔપચારિક ચર્ચા ફેબ્રુઆરી 2025 માં વડા પ્રધાન મોદીની વોશિંગ્ટન મુલાકાત દરમિયાન થઈ હતી.
આ સોદાનો ઉદ્દેશ્ય 2030 સુધીમાં બંને દેશો વચ્ચેના વર્તમાન વેપાર વોલ્યુમને આશરે $191 બિલિયનથી વધારીને $500 બિલિયન કરવાનો છે. આનો અર્થ એ થયો કે વેપાર બમણાથી વધુ કરવા અંગે ચર્ચા થઈ હતી.
ભારત-અમેરિકા વેપાર સોદા પર સસ્પેન્સ યથાવત છે
ભારત અને અમેરિકા વચ્ચે વેપાર સોદા અંગે ચર્ચાઓ લાંબા સમયથી ચાલી રહી છે. જોકે, અત્યાર સુધી કોઈ સકારાત્મક સમાચાર સામે આવ્યા નથી. ટ્રમ્પે એ પણ સ્પષ્ટ કર્યું નથી કે આ કરાર ક્યારે અંતિમ સ્વરૂપ આપવામાં આવશે. જોકે આ મુદ્દે બંને દેશો વચ્ચે વિવિધ સ્તરે ચર્ચાઓ થઈ છે.
આ દરમિયાન, અમેરિકન બજારમાં ભારતીય ઉત્પાદનો પર ભારે ટેરિફ યથાવત છે. ભારતમાંથી અમેરિકામાં નિકાસ થતી ઘણી વસ્તુઓ પર 50 ટકા સુધીની ડ્યુટી લાદવામાં આવે છે. ટ્રમ્પે ઈરાન સાથેના વેપાર સંબંધો પર વધારાના 25 ટકા ટેરિફ લાદવાની પણ વાત કરી છે.
