नवी दिल्ली : केंद्रीय कृषी मंत्री शिवराज सिंह चौहान यांनी शुक्रवारी ब्राझीलच्या कृषी मंत्री आणि त्यांच्या शिष्टमंडळाशी चर्चा केली.या चर्चेत नैसर्गिक आणि सेंद्रिय शेती, डाळी आणि तेलबिया मोहिमा, एकात्मिक शेती आणि भारतात ब्राझील-समर्थित उत्कृष्टता केंद्राची स्थापना या विषयांचा समावेश होता, ज्यावर संभाव्य सामंजस्य करार (एमओयू) केला जाणार आहे.
पत्रकारांशी बोलताना चौहान म्हणाले, ब्राझीलचे कृषी मंत्री आणि त्यांच्या टीमसोबत खूप उपयुक्त चर्चा झाली. आमचे आयसीएआर आणि ब्राझीलचे सहकारी अनेक क्षेत्रात सहकार्य करतील. यासोबत सामंजस्य करारावर स्वाक्षरी करण्यासाठी चर्चा सुरू आहे. ब्राझीलला नैसर्गिक शेती आणि सेंद्रिय शेतीमध्ये खूप रस आहे.आम्ही यावर चर्चा आणि वाटाघाटी करत आहोत.अनेक मुद्द्यांवर चर्चा सुरू आहे.”
ते पुढे म्हणाले, “भारतात, आम्ही डाळी, तेलबिया अभियान आणि एकात्मिक शेतीवर वेगाने काम करत आहोत. ब्राझीलने येथे एक उत्कृष्टता केंद्र स्थापन करण्यास सहमती दर्शविली आहे. आम्ही यावरही चर्चा केली आहे.एक मोठे शिष्टमंडळ येथे आले आहे. यामुळे दोन्ही देशांमधील संबंध निश्चितच मजबूत होतील.तत्पूर्वी, ब्राझीलचे कृषी विकास आणि कुटुंब शेती मंत्री लुईझ पाउलो टेक्सेरा फेरेरा यांनी निसर्ग-आधारित कृषी उपायांमधील भारताच्या अनुभवातून शिकण्यासाठी उच्च-स्तरीय शिष्टमंडळासह मोदीपुरम येथील आयसीएआर-इंडियन इन्स्टिट्यूट ऑफ फार्मिंग सिस्टम्स रिसर्चला भेट दिली.
