नवी दिल्ली : भारतामध्ये साखर उत्पादन 262.14 लाख टनांवर पोहोचले आहे, जे मागील वर्षी याच कालावधीतील 237.24 लाख टनांच्या तुलनेत सुमारे 10.5 टक्के अधिक आहे. ही माहिती इंडियन शुगर अँड बायो-एनर्जी मॅन्युफॅक्चरर्स असोसिएशन (ISMA) च्या आकडेवारीतून समोर आली आहे. सध्या देशभरात 157 साखर कारखाने कार्यरत आहेत, तर मागील वर्षी याच वेळी 182 कारखाने चालू होते.
देशातील प्रमुख उत्पादक राज्य उत्तर प्रदेशमध्ये आतापर्यंत 81.3 लाख टन साखर उत्पादन झाले आहे, जे मागील वर्षीच्या 81.2 लाख टनांच्या जवळजवळ समान आहे. येथे सध्या 78 कारखाने चालू आहेत, तर मागील वर्षी याच तारखेला 83 कारखाने कार्यरत होते. महाराष्ट्रात साखर उत्पादन 98.46 लाख टन आणि कर्नाटकात 46.04 लाख टन झाले आहे, जे मागील वर्षीच्या याच कालावधीत अनुक्रमे 78.70 लाख टन आणि 39.15 लाख टन होते. या दोन राज्यांमध्ये सध्या 26 कारखाने चालू आहेत, तर मागील हंगामात याच वेळी 27 कारखाने कार्यरत होते. विशेष म्हणजे, दक्षिण कर्नाटकातील काही कारखाने जून/जुलै पासून सप्टेंबर 2026 पर्यंतच्या विशेष हंगामात पुन्हा सुरू होण्याची शक्यता आहे.
जसे-जसे साखर हंगाम आपला अंतिम टप्पा गाठत आहे, साखर उद्योगाला किमान विक्री मूल्य (MSP) लवकर वाढवण्याची अपेक्षा आहे. ISMA च्या मते, उत्पादन खर्च वाढल्यामुळे आणि साखरेला मिळणारा भाव कमी असल्यामुळे कारखान्यांवर आर्थिक ताण येत आहे. ज्यामुळे शेतकऱ्यांच्या एफआरपी थकबाकीचा आकडा वाढत आहे. महाराष्ट्रात फेब्रुवारी 2026 पर्यंत थकीत एफआरपीची रक्कम 4,898 कोटी रुपयांपर्यंत पोहोचली आहे, तर मागील वर्षी याचवेळी ही रक्कम 2,949 कोटी रुपये होती.
साखर उद्योगाचे म्हणणे आहे की, साखर उत्पादनाच्या खर्चाच्या अनुरूप MSP मध्ये वेळेत सुधारणा करणे अत्यावश्यक आहे, जेणेकरून कारखान्यांची आर्थिक स्थिती सुधारेल, शेतकऱ्यांना वेळेत बिले मिळतील आणि बाजार स्थिर राहील, तसेच सरकारवर अतिरिक्त आर्थिक भार येणार नाही. ISMA ने असेही सांगितले की, अतिरिक्त साखरेच्या साठा आणि कमी होणाऱ्या भावांमुळे केंद्र सरकारने साखरेचा MSP आणि एथेनॉल खरेदी भाव सुधारण्याची गरज आहे, जेणेकरून शेतकरी आणि कारखान्यांचे हित संरक्षित राहील.
