अहिल्यानगर : अशोक साखर कारखान्याने यंदा ३००० रुपये पहिली उचल जाहीर केली आहे. मात्र सभासदांनी ३,५५० रुपये दराची अपेक्षा केली होती. कारखाना व्यस्थापनाकडून ऊस भावाबद्दल अपेक्षाभंग झाला असल्याने आर्थिक नुकसान टाळण्यासाठी सभासद नाईलाजास्तव बाहेरच्या कारखान्यांना ऊस देत आहेत. ‘अशोक’ ची आर्थिक अवस्था बिकट असल्याने मागील हंगामातील २०० रुपये प्रती टन ऊस उत्पादकास अद्याप मिळाले नाहीत. कामगारांचे दहा महिन्यांचे पगार थकीत असल्याने ऊसाचे पेमेंट होतील की नाही, या बाबत ऊस उत्पादक सभासदांमध्ये संभ्रम निर्माण झाला आहे असा आरोप स्वाभिमानी शेतकरी संघटनेचे जिल्हाध्यक्ष जितेंद्र भोसले, सुरेश ताके व दत्तात्रेय लिप्टे यांनी केला.
याबाबत स्वाभिमानी संघटनेच्या निवेदनात म्हटले आहे की, कारखान्याचा आर्थिक स्थिती बिघडण्यास अशोक कारखान्याचे चेअरमन भानुदास मुरकुटे व संचालक मंडळ जबाबदार आहेत. गेली ३७ वर्षे दर कमी मिळूनही कारखान्याच्या सभासदांनी ऊस पुरविला. पण आता सभासदांच्या सहनशीलतेचा अंत झाला आहे. कारखान्याने पहिली उचल ३,२५० व हंगाम संपताना उर्वरित २,०० रुपये देण्याचे जाहिर करावे, अशी मागणी केली आहे. अन्य कारखान्यांपेक्षा टनामागे ५०० रुपये कमी मिळतील, या धास्तीने सभासद शेतकरी जास्त भाव देणाऱ्या कारखान्यास ऊस पुरवठा करण्याच्या मानसिकतेत आहेत. याची व्यवस्थापनाने गांभियनि दखल घेणे गरजेचे असल्याचे या कार्यकर्त्यांनी म्हटले आहे.
