पटना : इथेनॉलने भरलेला टँकर जप्त केल्याप्रकरणी पाटणा उच्च न्यायालयाने राज्य सरकारला २ लाख रुपयांचा दंड ठोठावला आहे. बेगुसरायमध्ये इथेनॉलने भरलेल्या टँकरच्या कथित अनुचित जप्तीसंदर्भात हा आदेश देण्यात आला. न्यायमूर्ती पी. बी. बजनाथ्री यांच्या अध्यक्षतेखालील खंडपीठाने ‘मधु ट्रान्सपोर्ट’च्या याचिकेवर सुनावणी करताना हा आदेश दिला आहे. याचिकाकर्त्याने सांगितले की, त्यांचा टँकर इंडियन ऑइलच्या बरौनी रिफायनरीला ४०,००० लिटर इथेनॉल घेऊन जात होता. गाडीत आवश्यक वैध कागदपत्रे होती. असे असूनही, पोलिसांनी संशयावरून टँकर ताब्यात घेतला आणि दारू कायद्याअंतर्गत एफआयआर नोंदवला.
न्यायालयाने आपल्या आदेशात म्हटले आहे की, जप्तीच्या वेळी टँकरमधून संपूर्ण ४०,००० लिटर इथेनॉल जप्त करण्यात आले होते आणि डिजिटल लॉक देखील सुरक्षित स्थितीत होता, ज्यामुळे इथेनॉलचा गैरवापर झाला नसल्याचे स्पष्ट होते. याला अधिकारांचा अविचारी वापर असल्याचे म्हणत न्यायालयाने राज्य सरकारला या प्रकरणाची विभागीय चौकशी करण्याचे आणि दोषी अधिकाऱ्यांवर कठोर कारवाई करण्याचे आदेश दिले. तसेच, याचिकाकर्त्याला १ लाख रुपये आणि वकील कल्याण निधीत १ लाख रुपये जमा करण्याचे निर्देश देण्यात आले आहेत.
