नवी दिल्ली : आशिया आणि आफ्रिका यांच्यातील व्यापार, कृषी सहकार्य, गुंतवणूक आणि तंत्रज्ञान देवाणघेवाण वाढवण्यासाठी ‘एशिया आफ्रिका अॅग्री अलायन्स’ या नव्या संस्थात्मक व्यासपीठाची स्थापना करण्यात आली आहे. ही संस्था सेक्शन 8 अंतर्गत नॉन-प्रॉफिट संस्थेच्या स्वरूपात स्थापन करण्यात आली असून कृषी-अन्न मूल्य साखळीत व्यापार भागीदारी, धोरणात्मक समन्वय, तंत्रज्ञानाची देवाणघेवाण आणि गुंतवणूक वाढवण्यासाठी संरचित चौकट तयार करण्याचे उद्दिष्ट आहे.
आशिया आणि आफ्रिका मिळून जगातील कृषी उत्पादनाचा मोठा हिस्सा निर्माण करतात. या दोन प्रदेशांमधील द्विपक्षीय कृषी व्यापार दरवर्षी 90 अब्ज डॉलर्सपेक्षा अधिक असून जागतिक कृषी उत्पादनात त्यांचा 40 टक्क्यांहून अधिक वाटा आहे. आफ्रिका खंडात जगातील सुमारे 65 टक्के लागवडीयोग्य जमीन उपलब्ध आहे. तसेच येथे तरुण आणि वेगाने वाढणारी कामगारशक्ती आहे. 2030 पर्यंत आफ्रिकेचा कृषी क्षेत्राचा बाजार 1 ट्रिलियन डॉलर्सपर्यंत पोहोचण्याचा अंदाज आहे.
श्री रेणुका शुगर्सचे कार्यकारी अध्यक्ष अतुल चतुर्वेदी म्हणाले की, आफ्रिकेकडे मोठी कृषी क्षमता आणि विपुल लागवडीयोग्य जमीन आहे, तर आशियाने प्रक्रिया उद्योग, पुरवठा साखळी आणि कृषी तंत्रज्ञानामध्ये मजबूत क्षमता विकसित केली आहे.ते म्हणाले, एशिया आफ्रिका अॅग्री अलायन्ससारखे व्यासपीठ या परस्परपूरक ताकदीचे मोठ्या प्रमाणावर भागीदारीत रूपांतर करू शकते, ज्याचा फायदा दोन्ही प्रदेशांतील शेतकरी, उद्योग आणि ग्राहकांना होईल.
कर्नाटक कृषी मूल्य आयोगाचे अध्यक्ष आणि नॅशनल रेनफेड एरिया ऑथॉरिटीचे माजी मुख्य कार्यकारी अधिकारी डॉ. अशोक दलवाई यांनी सांगितले की, भारताचे आफ्रिकी देशांशी कृषी क्षेत्रातील सहकार्य गेल्या काही वर्षांत सातत्याने वाढले आहे. नव्याने स्थापन झालेली ही आघाडी ज्ञानाची देवाणघेवाण करून भागीदारी अधिक मजबूत करू शकते.
एशिया आफ्रिका अॅग्री अलायन्सचे संयोजक कैलाश सिंग यांच्या मते, ही संस्था एशिया-आफ्रिका कृषी कॉरिडॉर, शेतातून बाजारपेठेपर्यंत जोडणी, तंत्रज्ञान भागीदारी आणि गुंतवणूक सुलभता मंच यांसारख्या उपक्रमांना पाठबळ देईल, ज्यामुळे दोन्ही खंडांतील कृषी परिसंस्था अधिक बळकट होतील.
