નવી દિલ્હી: બેંક ઓફ બરોડાના તાજેતરના અહેવાલ મુજબ, ભારતમાં ખરીફ વાવણીમાં 18 જુલાઈ, 2025 સુધી વાર્ષિક ધોરણે (YoY) 4.1 ટકાનો નોંધપાત્ર વધારો નોંધાયો છે, જેને સામાન્ય કરતાં સારા ચોમાસા અને દેશભરમાં સારા જળાશય સ્તર દ્વારા ટેકો મળ્યો છે.
અહેવાલમાં વધુમાં જણાવાયું છે કે, ખરીફ પાક હેઠળનો કુલ વિસ્તાર 708.31 લાખ હેક્ટર સુધી પહોંચી ગયો છે, જે ગયા વર્ષના સમાન સમયગાળા દરમિયાન 680.38 લાખ હેક્ટર કરતા વધુ છે. આ સુધારો વર્તમાન ચોમાસા દરમિયાન નોંધાયેલા સરેરાશ કરતાં 6 ટકા વધુ વરસાદને કારણે થયો છે કારણ કે દક્ષિણપશ્ચિમ ચોમાસું મુખ્ય કૃષિ ક્ષેત્રોમાં સતત આગળ વધી રહ્યું છે.
વૃદ્ધિમાં અગ્રણી બરછટ અનાજ અને ચોખા હતા, જેમાં વાવેતરમાં અનુક્રમે 13.6 ટકા અને 12.4 ટકાનો વધારો જોવા મળ્યો હતો. કઠોળના પાકમાં પણ 203 ટકાનો સકારાત્મક વિકાસ નોંધાયો છે, જે મુખ્યત્વે મગના વાવેતરને કારણે થયો છે. જોકે, તેલીબિયાં અને કપાસના વાવેતરમાં અનુક્રમે ૩.૭ ટકા અને 3.4 ટકાનો ઘટાડો થયો છે.
કૃષિ અર્થશાસ્ત્રીઓ માને છે કે ખરીફ વાવણીમાં આ વધારો આગામી મહિનાઓમાં ખાદ્ય ફુગાવા પર દબાણ ઘટાડશે અને ગ્રામીણ આર્થિક ભાવનાને મજબૂત બનાવશે. વધુમાં, વરસાદનું વિતરણ મોટાભાગે અનુકૂળ રહ્યું છે. મધ્ય અને ઉત્તરપશ્ચિમ ભારતમાં સામાન્ય કરતાં અનુક્રમે 22 ટકા અને 29 ટકા વધુ વરસાદ નોંધાયો છે. જોકે, પૂર્વ અને ઉત્તરપૂર્વ ભારતમાં 23 ટકા સુધીનો અભાવ ચાલુ રહ્યો છે, જેની અસર બિહાર, આસામ અને મણિપુર જેવા રાજ્યો પર પડી છે.
આ સાથે, 18 જુલાઈ સુધીમાં ભારતના જળાશય સંગ્રહ કુલ ક્ષમતાના ૫૭ ટકા છે, જે ગયા વર્ષના 29 ટકા કરતા ઘણો વધારે છે. દક્ષિણ પ્રદેશ 65 ટકા સંગ્રહ સાથે આગળ છે, ત્યારબાદ પશ્ચિમી (59 ટકા) અને મધ્ય (54ટકા) પ્રદેશો છે, જે આગામી અઠવાડિયામાં સિંચાઈ માટે પાણીની સારી ઉપલબ્ધતા દર્શાવે છે. ભારતીય હવામાન વિભાગ (IMD) દ્વારા તટસ્થ ENSO અને IOD પરિસ્થિતિઓ ચાલુ રહેવાની આગાહી સાથે, આગામી બે અઠવાડિયામાં ઉત્તરપશ્ચિમ ભારતમાં વધુ વરસાદની અપેક્ષા છે, જે પાછળ રહેલા પ્રદેશોમાં વાવણીના અંતરને ભરવામાં મદદ કરી શકે છે.
