बेळगाव : राज्य सरकारने शेतकऱ्यांच्या मागणीनुसार उसाला दर दिलेला नाही. त्यामुळे हिवाळी अधिवेशनादरम्यान ऊसदरासाठी मोठे आंदोलन उभारले जाणार आहे. उसाला ४,५०० रुपये भाव देण्यात यावा, अशी आपली आग्रही मागणी आहे. उसापासून इथेनॉलसह इतर उपपदार्थ तयार केले जातात. त्यामधून कारखान्यांना मोठ्या प्रमाणात लाभ होत आहे. त्यामुळे उसाला वाढीव भाव देण्यासाठी आंदोलन केले जाणार आहे. या आंदोलनात जवळपास एक लाख शेतकरी एकवटणार आहेत, अशी माहिती शेतकरी नेते चुनाप्पा पुजारी यांनी दिली.
पुजारी म्हणाले की, शेतकरी संघटनांमध्ये संघटितपणा नसल्याने प्रशासनाकडून व राजकर्त्यांकडून नेहमीच शेतकऱ्यांच्या आंदोलनांकडे दुर्लक्ष करण्यात येते. मात्र, ऊस दरासाठी मुडेलगी तालुक्यातील गुर्लापूर क्रॉस येथे नुकतेच करण्यात आलेले आंदोलन राज्यभरात चर्चेचा विषय ठरले. त्यामुळे हिवाळी अधिवेशनावेळी करण्यात येणाऱ्या ऊसदर आंदोलनात एक लाख शेतकरी सहभाग घेणार आहेत. कृषी खात्याकडून यंदा निकृष्ट दर्जाचे सोयाबीन बियाणे वितरण करण्यात आल्याने शेतकऱ्यांना आर्थिक नुकसानीला सामोरे जावे लागले. त्यामुळे शेतकऱ्यांना भरपाई मिळवून देण्यासाठी लढा दिला जाणार आहे. शेतवडीत काम करत असताना शेतकऱ्यांना विजेचा धक्का बसून, सर्पदंश होऊन, चारा आणताना मृत्यू झाल्याच्या घटना अनेक वेळा घडल्या आहेत. यासाठी केवळ एक लाख रुपये भरपाई दिली जात आहे. ही भरपाई पाच लाखांपर्यंत वाढवून देण्यात यावी, याकरिता सरकारकडे मागणी केली जाणार आहे.
