कोल्हापूर : वारणा सहकारी साखर कारखान्यात ऊस वजनामध्ये तफावत करून ३५ हजार १४ रुपये इतक्या रकमेची फसवणूक केल्याप्रकरणी कारखान्याचा कॉम्प्युटर ऑपरेटरविरोधात कोडोली पोलिस स्थानकात गुन्हा दाखल झाला. फिर्याद वारणा कारखान्याचे शिफ्ट सुपरवायझर रोहन बाबासो काईंगडे (रा. कोडोली) यांनी कोडोली पोलिसांत दिली. साहील लक्ष्मण वकटे (वय २०, रा. काखे, ता. पन्हाळा) असे संशयिताचे नाव आहे. संदीप गायकवाड (रा. काखे) यांच्या वाहनामध्ये असणाऱ्या उसाच्या वजनात एकूण ९.८८० टन वजनाची तफावत करून एकूण ३५ हजार १४ रुपये इतक्या किमतीची वारणा साखर कारखान्याची फसवणूक केल्याचा आरोप संशयितावर आहे.
कोडोली पोलिसांनी सांगितले की, संशयित साहील लक्ष्मण वकटे हा कंत्राटी कॉम्प्युटर ऑपरेटर आहे. वाहनतळावर काखे येथील संदीप प्रभाकर गायकवाड यांच्या ताब्यातील वाहनातून ऊस भरून घेऊन वारणा कारखान्यात गाडीतळावर आला होता. अंगत ट्रॉलीमध्ये रामचंद्र वकटे यांचा ऊस होता तर मागील बाजूची चारचाकी ट्रॉलीमध्ये कमल भीमराव देसाई (रा. काखे) यांच्या मालकीचा ऊस होता. या वाहनांच्या दोन्ही ट्रॉली वेगळी असताना, साहील याने त्यांचे एकत्रित २०.८९० टन वजन घेतले. निव्वळ उसाचे वजन १६.७२१ असे चुलते रामचंद वकटे यांच्या नावे वजन घेतले. वेगवेगळी वजने घेऊन फसवणूक केल्याप्रकरणी साहील वकटे याच्यावर गुन्हा दाखल झाला. कोडोली पोलिस ठाण्याचे सहायक पोलिस निरीक्षक कैलास कोडग यांच्या मार्गदर्शनाखाली सहायक फौजदार पाटील तपास करीत आहेत.
