छत्रपती संभाजीनगर : बीड जिल्हा प्रशासनाने ऊसतोड महिला कामगार आणि त्यांच्या मुलांच्या आरोग्यविषयक समस्या सोडवण्यासाठी सरकारी संस्थांसोबत संपर्क प्रतिनिधी म्हणून काम करणाऱ्या ‘आरोग्य मित्र’ची नियुक्ती करण्याचा निर्णय घेतला आहे. एका उच्चपदस्थ अधिकाऱ्याने दिलेल्या माहितीनुसार, हे ‘आरोग्य मित्र’ ऊसतोड महिला कामगारांमधूनच निवडले जातील. दरवर्षी, ऊस तोडणी हंगामात हजारो महिला बीडमधून इतर जिल्ह्यांमध्ये स्थलांतरित होतात. ऊस गाळप हंगाम साधारणपणे ऑक्टोबर, नोव्हेंबरमध्ये सुरू होतो आणि मार्च, एप्रिलमध्ये संपतो.
याबाबत ‘पीटीआय’शी बोलताना बीडचे जिल्हाधिकारी विवेक जॉन्सन म्हणाले, आम्ही या वर्षीपासून ‘आरोग्य मित्र’ नियुक्त करणार आहोत, हे महाराष्ट्रातील इतर जिल्ह्यांमध्ये ऊस तोडण्यासाठी जाणाऱ्या ऊसतोडणी महिला कामगारांमध्ये असतील. बीडमधून इतर जिल्ह्यांमध्ये कामगार जातात आणि येथील प्रशासनाशी संपर्कात नसतात. परिणामी, हस्तांतरणादरम्यान आणि नंतर त्यांना येणाऱ्या समस्या सुटत नाहीत. म्हणून, पाच वर्षांखालील महिला आणि त्यांच्या मुलांच्या या समस्या सोडवण्यासाठी, आम्ही आरोग्य मित्रांची नियुक्ती करणार आहोत.”
जिल्हाधिकारी विवेक जॉन्सन म्हणाले की, ‘आरोग्य मित्र’ म्हणून नियुक्त केलेल्या व्यक्तीला प्रशिक्षण दिले जाईल आणि तो बीडमधील आशा कार्यकर्त्या तसेच अंगणवाडी कर्मचाऱ्यांच्या संपर्कात असेल. त्या आम्हाला त्यांच्या समस्या सांगू शकतील आणि आम्ही त्यावेळी ज्या स्थानिक प्रशासनात काम करत आहेत, त्या प्रशासनाशी या समस्या सोडवण्यास मदत करू शकतो. यासाठी सर्वेक्षण सुरू आहे आणि किती आरोग्य मित्र नियुक्त करायचे हे नंतर ठरवले जाईल.
आम्ही ऑगस्टमध्ये त्यांचे प्रशिक्षण सुरू करू, असे त्यांनी सांगितले. दरम्यान, गेल्या वर्षी केलेल्या सर्वेक्षणानुसार, ऑगस्ट ते ऑक्टोबर २०२४ या कालावधीत बीडमधून ७८,७४६ महिला ऊस तोडण्यासाठी इतर जिल्ह्यांमध्ये गेल्या होत्या. त्यापैकी ३४,१५१ महिला ३० वर्षांपेक्षा कमी वयाच्या होत्या, १,५२३ महिला गर्भवती होत्या आणि १३५ महिला गर्भधारणेच्या जोखीम श्रेणीत होत्या, असे दुसऱ्या अधिकाऱ्याने सांगितले. या एकूण महिलांपैकी ८४३ महिलांनी गर्भाशयाशी संबंधित शस्त्रक्रिया केल्या. परंतु या शस्त्रक्रिया ऊस तोडणी हंगामाच्या अगदी आधी केल्या नव्हत्या.
