नवी दिल्ली : खुल्या बाजार विक्री योजने (घरगुती)-ओएमएसएस (डी) अंतर्गत सरकार इथेनॉल उत्पादनासाठी इथेनॉल डिस्टिलरींसाठीची तांदळाच्या विक्रीसाठी राखीव किंमत वाढवू शकते. सध्याच्या ओएमएसएस (डी) धोरण २०२४-२५ अनुसार, इथेनॉल उत्पादनासाठी इथेनॉल डिस्टिलरींना तांदळाच्या विक्रीसाठी राखीव किंमत प्रति क्विंटल (संपूर्ण भारतात) २,२५० रुपये आहे. या तांदळाचे एकूण प्रमाण ५२ लाख मेट्रिक टन (एलएमटी) पेक्षा जास्त नाही आणि हे प्रमाण ३१ ऑक्टोबर २०२५ पर्यंत वैध आहे.
अलिकडील एका बैठकीत, सचिवांच्या समितीने (सीओएस) इथेनॉल उत्पादनासाठी डिस्टिलरीजना २,३२० रुपये प्रती क्विंटल दराने तांदूळ विक्रीची शिफारस केली आहे. ही किंमत सध्याच्या २,२५० रुपयांपेक्षा अधिक आहे. याची कमाल मर्यादा ५२ एलएमटीपर्यंत आहे. नवीन राखीव किंमत एक नोव्हेंबरपासून लागू होईल, तर विद्यमान दर ३१ ऑक्टोबरपर्यंत वैध राहतील. इथेनॉल पुरवठा वर्ष (ईएसवाय) २०२५-२६ (१ नोव्हेंबर २०२५ पासून) दरम्यान इथेनॉल खरेदीसाठी निविदा प्रक्रिया ऑगस्ट/सप्टेंबरमध्ये सुरू होण्याची अपेक्षा आहे.
इथेनॉल डिस्टिलरीजना इथेनॉल उत्पादनासाठी तांदूळ पुरवण्याच्या उद्देशाने, शक्य तितक्या जुन्या, तुटलेल्या तांदळाचा वापर करावा अशी शिफारस करण्यात आली होती. चालू ईएसवाय २०२४-२५ मध्ये, मे महिन्यात पेट्रोलमध्ये इथेनॉल मिश्रण १९.८ टक्क्यांवर पोहोचले. तर नोव्हेंबर २०२४ ते मे २०२५ पर्यंत एकत्रित सरासरी इथेनॉल मिश्रण १८.८ टक्के होते. अधिकृत आकडेवारीनुसार, मे २०२५ मध्ये ईबीपी कार्यक्रमांतर्गत इथेनॉल मिश्रणाचे एकूण प्रमाण ९५.१ कोटी लिटर होते. त्यामुळे नोव्हेंबर २०२४ ते मे २०२५ या कालावधीत मिश्रणाचे एकूण प्रमाण ५७२.१ कोटी लिटर झाले.
