तेहरान : इराणने होर्मुझच्या सामुद्रधुनीला जवळजवळ रोखल्यामुळे मध्य पूर्वेतील रिफायनरींना होणाऱ्या पुरवठ्याबद्दल चिंता वाढली आहे. त्यामुळे साखरेच्या किमती पाच महिन्यांच्या उच्चांकावर पोहोचल्या आहेत, असे अरेबियन गल्फ बिझनेस इनसाइटच्या एका अहवालात म्हटले आहे. या अहवालानुसार, गुरुवारी न्यूयॉर्कमध्ये मे २०२६ साठीच्या साखरेच्या वायद्यांमध्ये ३.९ टक्क्यांनी वाढ झाली. तर लंडन ‘आयसीई’मध्ये मे महिन्याच्या डिलिव्हरीसाठीच्या पांढऱ्या साखरेचा भाव ३.२ टक्क्यांच्या वाढीसह बंद झाला. पेट्रोलच्या वाढत्या किमतींमुळे इथेनॉल महाग होत आहे. हे साखरेसाठी एक सकारात्मक चिन्ह आहे असे ‘बारचार्ट’ने म्हटले आहे. गुरुवारी पेट्रोलच्या किमतींनी साडे तीन वर्षांतील उच्चांक गाठला. त्यामुळे जगभरातील साखर कारखान्यांना इथेनॉलचे उत्पादन वाढीस प्रवृत्त केले आहे. मध्यपूर्वेतील रिफायनरींपर्यंत कच्ची साखर पोहोचवण्याचा होर्मुझ सामुद्रधुनी हा एक प्रमुख मार्ग आहे. मध्यपूर्वेत कच्च्या साखरेचे रुपांतर पांढऱ्या साखरेत रूपांतर केले जाते.
कोवरिग ॲनालिटिक्सचे क्लॉडिउ कोवरिग यांनी ब्लूमबर्गला सांगितले की, जलमार्ग जवळजवळ बंद झाल्यामुळे जागतिक साखर व्यापाराच्या सुमारे ६ टक्क्यांवर परिणाम झाला आहे. मध्यपूर्वेतील शुद्धीकरण केंद्रांकडे कच्ची साखर घेऊन जाणारी जहाजे एकतर अडकली आहेत किंवा त्यांना मार्ग बदलण्यास भाग पाडले जात आहे. बारचार्टनुसार, जागतिक स्तरावर साखरेचा साठा अतिरिक्त होण्याची भीती निर्माण झाल्याने मार्चच्या सुरुवातीला साखरेच्या वायद्यांमधील किमती पाच वर्षातील नीचांकी पातळीवर घसरल्या. २८ फेब्रुवारी रोजी सुरू झालेल्या अमेरिका, इस्रायल आणि इराण यांच्यातील संघर्षानंतर परिस्थिती अधिकच बिघडली आहे. यामध्ये गल्फ कोऑपरेशन कौन्सिल (सीसीसी) प्रदेशातील तेल आणि वायू पायाभूत सुविधांवरील हल्ल्यांचा समावेश आहे.
