परभणी : यंदा झालेल्या दमदार पावसामुळे जायकवाडी धरण, गोदावरी नदीच्या लाभक्षेत्रातील बंधारे पूर्ण क्षमतेने भरले आहेत. विहीर, बोरवेलला मुबलक पाणी उपलब्ध झाले आहे. पाण्याची उपलब्धता झाल्यामुळे शेतकरी पूर्व हंगामी ऊस लागवडीचे नियोजन करत आहेत. ऊस पिकाची लागवड करण्यासाठी ऊसाच्या योग्य जातीची निवड व ऊस पिकाच्या एकात्मिक व्यवस्थापन संदर्भात शेतकऱ्यांपर्यंत शास्त्रोक्त माहिती पोहोचवण्याच्या अनुषंगाने ट्वेंटीवन शुगर्स युनिट २ तर्फे ऊस विकास कार्यशाळेचे आयोजन करण्यात आले होते.
कारखान्याचे अध्यक्ष, आमदार अमित देशमुख, उपाध्यक्ष विजय देशमुख, कार्यकारी संचालक सुभाष पाटील, मुख्य शेतकी अधिकारी तुकाराम गडदे यांच्या मार्गदर्शनाखाली ऊस विकास अधिकारी शिवप्रसाद येळकर यांच्या संकल्पनेतून मध्यवर्ती ऊस संशोधन केंद्र पाडेगावचे ऊस पैदासकार शास्त्रज्ञ डॉ सुरेश उबाळे यांच्या माध्यमातून दोन दिवसीय शिवार फेरीचे आयोजन करून शेतकऱ्यांना मार्गदर्शन करण्यात आले. या उपक्रमांतर्गत सोनपेठ तालुक्यातील रामपुरी व परळी तालुक्यातील लोणी येथे कार्यशाळा घेऊन येळकर यांनी उसावर पडलेल्या चाबुक काणी, गवताळ वाढ, पोक्का बोईंग रोग तसेच कांडी कीडबाबत सविस्तर माहिती दिली. कृषी संशोधन केंद्रांची शिफारस नसलेल्या एसएनके १३३७४, सिओ ६२१७५ बाबत माहिती दिली. त्याचबरोबर मागील वर्षी ऊस लागवड करताना शेतकऱ्यांच्या झालेल्या चुकांबाबत ऊहापोह केला.
मध्यवर्ती ऊस संशोधन केंद्र पाडेगावचे ऊस पैदासकार शास्त्रज्ञ डॉ. सुरेश उबाळे यांनी उतारा कमी असण्याची कारणे, ऊस जातीची भेसळ, ऊस लागवडीचा योग्य कालावधी, राज्यासाठी शिफारस असलेल्या फुले ऊस १५००६, फुले ऊस १५०१२, फुले ऊस १३००७, एम एस १०००१, सिओ ८६०३२, सिओव्हिएसआय १८१२१ ऊस जातींची गुणवैशिष्ट्ये व प्रति हेक्टरी उत्पादकता आणि साखर उतारा, त्रिस्तरीय बेणे मळा पद्धती, रोप पद्धतीने ऊस लागवड, अन्नद्रव्य व्यवस्थापनसाठी रासायनिक खताच्या ग्रेड निहाय संतुलित मात्रा, ऊस लागवडीसाठी जमिनीची निवड, जमिनीची मशागत, सरी तयार करताना घ्यावयाची काळजी सेंद्रिय खतांचा वापर संदर्भात सविस्तर माहिती दिली.
डॉ. सुरेश उबाळे यांनी शासनामार्फत बंदी आणलेल्या सिओ ६२१७५ व शिफारस नसलेल्या एसएनके १३३७४ ऊस पिकाची लागवड न करण्याचे शेतकऱ्यांना आवाहन केले. मुख्य शेतकी अधिकारी तुकाराम गडदे यांनी कारखान्यामार्फत अनुदानित ऊस रोप वितरण, एकात्मिक ऊस व्यवस्थापन सल्ला केंद्र या ऊस विकास योजनांची माहिती दिली.
यावेळी ऊस पुरवठा अधिकारी सुरेश आळसे, सुधाकर कदम, रतन कदम, विभाग प्रमुख लक्ष्मीकांत रेवडकर, राम कुलकर्णी, दिनेश जयस्वाल, वैजनाथ हांडे, भगवान सोळंके, भगवान इखे, सुरेंद्र डुबे, गटप्रमुख गोपाळ जाधव, सर्वोत्तम दिवाण, भास्कर यादव, किशन सोळंके, किर्तेश्वर यादव, शरद शिंदे, दत्तात्रय गवळी, दिलीप फड, विजय सोळंके ऊस नर्सरी चालक विजय नांदूरे, रामपुरीचे शेतकरी ऍड ज्ञानेश्वर यादव, बाळू साठे, विशाल चौखट, सुरेश यादव, लोणीचे उपसरपंच प्रल्हाद शिंदे, विश्वनाथ शिंदे, गोविंद देवकते, लिंबाजी सोनवणे, नारायण सोनवणे, सुभाष सोनवणे, रघुनाथ सोनवणे, विश्वनाथ सोनवणे, दत्ता होळकर, आत्तम गुट्टे, गोविंद माने, हनुमंत यादव आदी शेतकरी मोठ्या संख्येने उपस्थित होते.
