सोलापूर : यंदाच्या गाळप हंगामात जिल्ह्यातील ३३ साखर कारखान्यांची धुराडे पेटली आहेत. गाळप हंगामाला सुरवात होऊन २७ दिवस उलटले आहेत. मात्र, सहकारी व खासगी अशा सर्वच साखर कारखानदारांनी ऊसदरप्रश्नी मौन बाळगले आहे. त्यामुळे आक्रमक बनलेल्या स्वाभिमानी शेतकरी संघटनेने शुक्रवारी (ता. २८) सोलापूर-विजयपूर महामार्गावर रास्ता रोको आंदोलन केले. शेजारच्या जिल्ह्यांत उसदराची पहिली उचल ३२०० ते ३६०० रुपये दिले जात आहे. त्यामुळे जिल्ह्यातील कारखान्यांनी पहिली उचल ३४०० रुपये द्यावी. हा ऊसदर जमा करण्यासाठी स्वाभिमानी शेतकरी संघटननेने एक डिसेंबरपर्यंतची ‘डेडलाइन’ दिली आहे. हा दर न मिळाल्यास आंदोलनाचा इशारा दिला आहे. त्यामुळे दोन डिसेंबरपासून ऊस दर आंदोलन तापण्याची चिन्हे आहेत.
स्वाभिमानी शेतकरी संघटनेने सोलापूर विजयपूर महामार्गावर शुक्रवारी सकाळी ११ ते १२ या वेळेत रास्ता रोको करत वाहतूक रोखली. त्यामुळे महामार्गावर वाहनांच्या लांब रांगा लागल्या होत्या. मंडल अधिकारी ज्योतिराम पवार, सहाय्यक पोलिस निरीक्षक मनोज पवार यांनी निवेदन स्वीकारले. यावेळी ज्येष्ठ शेतकरी नेते सिद्रामप्पा अब्दुलपूरकर यांनी शेतकऱ्यांनो, घरी बसून योग्य ऊसदर मिळणार नाही, त्यासाठी रस्त्यावर उतरावे लागेल, असे आवाहन केले. नियमानुसार, शेतकऱ्यांच्या खात्यांवर बिले जमा करणे बंधनकारक आहे. परंतु, अद्याप बिले दिली गेली नाहीत. त्यामुळे ऊस उत्पादन घटल्याने शेतकरी आर्थिक संकटात सापडले आहेत. यावेळी स्वाभिमानीचे जिल्हाध्यक्ष विजय रणदिवे, इक्बाल मुजावर, बंदलगीचे सरपंच लालासाहेब नदाफ, भंडारकवठेचे वसंत पाटील, राजूरचे अशोक देवकते, काँग्रेसचे सचिव महंमद शेख, मोहसीन पटले, पप्पू पाटील, विळ्याणी सुंटे, चाँद यादगिरे, बसवराज रामपुरे, कमलेश बमगौडे, तुकाराम शेतसंदी, जावेद आवटी, सिकंदर मकानदार हेही सहभागी झाले होते.
