નવી દિલ્હી: ગયા વર્ષે સારો વરસાદ અને શેરડીના વાવેતર વિસ્તારમાં થયેલા વધારાને કારણે દેશમાં ખાંડનું રેકોર્ડ ઉત્પાદન થયું છે. આ વર્ષે ખાંડના ઉત્પાદનમાં મહારાષ્ટ્ર ઉત્તર પ્રદેશને પાછળ છોડી ગયું છે અને મહારાષ્ટ્રમાં કેટલીક મિલો 15 જૂન સુધીમાં કાર્યરત રહેવાની શક્યતા છે. 30 મે સુધીમાં ખાંડનું ઉત્પાદન 15 ટકા વધીને રેકોર્ડ 35.24 મિલિયન ટન થયું છે. જ્યારે એક વર્ષ અગાઉના સમાન સમયગાળામાં ખાંડનું ઉત્પાદન 30.63 મિલિયન ટન હતું. એટલું જ નહીં, અત્યાર સુધીમાં હાંસલ કરેલું ખાંડનું ઉત્પાદન સમગ્ર 2020-21 માર્કેટિંગ વર્ષમાં થયેલા 31.12 મિલિયન ટન કરતાં ઘણું વધારે છે.
નેશનલ ફેડરેશન ઓફ કોઓપરેટિવ શુગર ફેક્ટરીઝ લિમિટેડ (NFCSFL)ના ડેટા અનુસાર, ચાલુ માર્કેટિંગ વર્ષના અંત સુધીમાં વધુ 4-5 લાખ ટન ખાંડનું ઉત્પાદન થવાની ધારણા છે. દેશમાં ખાંડના ઉત્પાદનમાં મહારાષ્ટ્રે ઉત્તર પ્રદેશ સહિત અન્ય તમામ રાજ્યોને પાછળ છોડી દીધા છે. રાજ્યમાં ખાંડનું ઉત્પાદન 30 મે સુધીમાં 13.68 મિલિયન ટન થયું છે, જે એક વર્ષ અગાઉના સમયગાળામાં 10.63 મિલિયન ટન હતું. ઉત્તર પ્રદેશમાં આ વર્ષે અત્યાર સુધીમાં ખાંડનું ઉત્પાદન 102 મિલિયન ટન થયું છે, જે એક વર્ષ અગાઉના સમાન સમયગાળામાં 11.01 મિલિયન ટન હતું. ડેટા દર્શાવે છે કે કર્ણાટકમાં ઉત્પાદન 4.25 મિલિયન ટનથી વધીને 5.92 મિલિયન ટન થયું છે. ઓક્ટોબર-નવેમ્બરમાં તહેવારોની મોસમ દરમિયાન ખાંડની પર્યાપ્ત ઉપલબ્ધતા સુનિશ્ચિત કરવા માટે કેન્દ્ર સરકારે સાવચેતીના પગલા તરીકે ચાલુ 2021-22 માર્કેટિંગ વર્ષમાં ખાંડની નિકાસ 10 મિલિયન ટન સુધી મર્યાદિત કરી છે.
