માનનીય કેન્દ્રીય ઉર્જા મંત્રી મનોહર લાલે આજે બેંગલુરુમાં કર્ણાટક રાજ્યના ઉર્જા ક્ષેત્રની વ્યાપક સમીક્ષા કરી. આ સમીક્ષા બેઠકમાં માનનીય કેન્દ્રીય વીજળી અને નવી અને નવીનીકરણીય ઊર્જા રાજ્યમંત્રી શ્રીપદ નાઈક, કર્ણાટકના માનનીય ઉર્જા મંત્રી કે.જે. જ્યોર્જ અને ભારત સરકાર, રાજ્ય સરકાર અને REC લિમિટેડના વરિષ્ઠ અધિકારીઓએ ભાગ લીધો હતો.
બેઠક દરમિયાન, રાજ્ય સરકારે કર્ણાટકમાં વીજ ઉત્પાદન, ટ્રાન્સમિશન અને વિતરણની વર્તમાન સ્થિતિ અંગે વિગતવાર પ્રેઝન્ટેશન આપ્યું. વીજ ઉત્પાદન મિશ્રણ, ટ્રાન્સમિશન ઈન્ફ્રાસ્ટ્રક્ચર માટે રાઈટ ઓફ વે (ROW) માં પડકારો અને વિતરણ ઈન્ફ્રાસ્ટ્રક્ચર સુધારવા માટે સમર્થનની જરૂરિયાત જેવા મુદ્દાઓ પર ચર્ચા કરવામાં આવી હતી.
માનનીય કેન્દ્રીય મંત્રી મનોહર લાલે રાજ્યને વીજ ઉત્પાદન મિશ્રણમાં નવીનીકરણીય ઉર્જાનો હિસ્સો વધારવા બદલ અભિનંદન પાઠવ્યા. તેમણે ભારપૂર્વક જણાવ્યું હતું કે તેમની મુલાકાતનો હેતુ રાજ્યમાં વીજ પુરવઠાને મજબૂત બનાવવા માટે જમીની સ્તરના મુદ્દાઓને વધુ સારી રીતે સમજવા અને નવી પહેલો શોધવાનો હતો.
મંત્રીએ રાજ્યને તેની વીજ વિતરણ કંપનીઓના વાર્ષિક નાણાકીય નુકસાનને ઘટાડવા અને ખર્ચ-આધારિત ટેરિફ લાગુ કરવા માટે પગલાં લેવા વિનંતી કરી. તેમણે સરકારી વિભાગોને લગતા લેણાં અને સબસિડીની સમયસર ચુકવણીના મહત્વ પર ભાર મૂક્યો અને રાજ્યને ઓગસ્ટ 2025 સુધીમાં સરકારી સંસ્થાઓ, સ્થાનિક સંસ્થાઓ અને વસાહતોમાં પ્રીપેડ સ્માર્ટ મીટર સંપૂર્ણપણે સ્થાપિત કરવાની સલાહ આપી. તેમણે સરકારી વીજ બાકી રકમના કાર્યક્ષમ સંચાલન માટે કેન્દ્રિય ચુકવણી પદ્ધતિની જરૂરિયાત પર પણ ભાર મૂક્યો.
મનોહર લાલે રાજ્ય સરકારને સમયમર્યાદામાં વાણિજ્યિક, ઔદ્યોગિક અને અન્ય ગ્રાહક વર્ગો માટે સ્માર્ટ મીટરિંગ અમલીકરણને ઝડપી બનાવવા નિર્દેશ આપ્યો. તેમણે ટ્રાન્સમિશન ઈન્ફ્રાસ્ટ્રક્ચરને અવરોધતી RoW સમસ્યાઓના વહેલા ઉકેલની સલાહ આપી અને ભારત સરકાર દ્વારા જારી કરાયેલ વળતર પધ્ધતિ અપનાવવા હાકલ કરી.
મંત્રીએ કર્ણાટકના વીજ ક્ષેત્રને મજબૂત બનાવવામાં ભારત સરકાર તરફથી સતત સહયોગની ખાતરી આપી અને રાજ્ય અને તેના લોકોના કલ્યાણ અને વિકાસ માટે કેન્દ્રની પ્રતિબદ્ધતાનો પુનરોચ્ચાર કર્યો.
