WPI માર્ચઃ માર્ચમાં જથ્થાબંધ ફુગાવો 14.55 ટકાના ચાર મહિનાના ઉચ્ચ સ્તરે પહોંચી ગયો છે. મોંઘવારી દરમાં વધારાનું મુખ્ય કારણ ક્રૂડ ઓઈલ અને કોમોડિટીના ભાવમાં વધારો હતો. જો કે માર્ચ મહિનામાં શાકભાજીના ભાવમાં ઘટાડો જોવા મળ્યો છે.
સોમવારે જાહેર કરાયેલા સરકારી ડેટા અનુસાર, WPI ફુગાવો એપ્રિલ 2021થી શરૂ થતા સળંગ 12મા મહિને બે આંકડામાં રહ્યો છે. છેલ્લી વખત WPI નવેમ્બર 2021 માં 14.87 ના આંકડાને સ્પર્શ્યો હતો.
ફેબ્રુઆરી 2022માં WPI આધારિત ફુગાવાનો દર 13.11 ટકા હતો, જે ગયા વર્ષે માર્ચ 2021માં 7.89 ટકા હતો. ખાદ્યચીજોનો ફુગાવો માર્ચમાં 8.19 ટકાથી ઘટીને 8.06 ટકા થયો છે. શાકભાજીનો ફુગાવો પણ ફેબ્રુઆરીમાં 26.93ની સામે ઘટીને 19.88 ટકા થયો છે.
વાણિજ્ય મંત્રાલયે એક નિવેદનમાં જણાવ્યું હતું કે માર્ચ 2022માં મોંઘવારીનો ઊંચો દર ક્રૂડ પેટ્રોલિયમ અને કુદરતી ગેસ, ખનિજ તેલ, મૂળભૂત ધાતુ વગેરેના ભાવમાં વધારાને કારણે હતો. ઉત્પાદિત માલસામાનનો ફુગાવો માર્ચમાં 10.71 ટકા હતો જે ફેબ્રુઆરીમાં 9.84 ટકા હતો, જ્યારે ઇંધણ અને પાવર બાસ્કેટમાં ફુગાવો માર્ચમાં 34.52 ટકા હતો.
ક્રૂડ પેટ્રોલિયમ ફુગાવો માર્ચમાં વધીને 83.56 ટકા થયો હતો, જે ફેબ્રુઆરીમાં 55.17 ટકા હતો.
ગયા અઠવાડિયે જાહેર કરાયેલ છૂટક ફુગાવો પણ માર્ચમાં વધીને 6.95 ટકા થયો હતો. આ સતત ત્રીજો મહિનો છે જ્યારે કન્ઝ્યુમર પ્રાઇસ ઇન્ડેક્સ (CPI) RBIની 6 ટકાની સહનશીલતા મર્યાદાને વટાવી ગયો છે.
