નરેન્દ્ર તોમરે સાંસદ પદ પરથી રાજીનામું આપ્યા બાદ કેન્દ્રીય મંત્રી અર્જુન મુંડા પણ કૃષિ અને ખેડૂત કલ્યાણ મંત્રાલયનો હવાલો સંભાળશે.
રાષ્ટ્રપતિ દ્રૌપદી મુર્મુએ કેન્દ્રીય પ્રધાન અર્જુન મુંડાને તેમના વર્તમાન પોર્ટફોલિયો ઉપરાંત કૃષિ અને ખેડૂત કલ્યાણ મંત્રાલયનો હવાલો સોંપવાનો નિર્દેશ આપ્યો છે.
ગઈકાલે, ભારતીય જનતા પાર્ટી (BJP) એ ત્રણ રાજ્યોમાં વિધાનસભાની ચૂંટણી જીત્યાના દિવસો પછી, પાર્ટીએ જે સાંસદોને આ ચૂંટણીમાં મેદાનમાં ઉતાર્યા હતા અને પોતપોતાના મતવિસ્તારમાં જીત્યા હતા, તેઓએ સંસદમાંથી રાજીનામું આપી દીધું છે.
મધ્યપ્રદેશ, રાજસ્થાન, છત્તીસગઢ અને તેલંગાણામાં યોજાયેલી વિધાનસભાની ચૂંટણીમાં ભાજપે કુલ 21 સાંસદોને મેદાનમાં ઉતાર્યા હતા. જેમાંથી 12 સાંસદો ચૂંટણી જીત્યા જ્યારે 9 હાર્યા. 12 વિજેતા સાંસદોમાંથી 11એ બુધવારે લોકસભા સાંસદ પદ પરથી રાજીનામું આપી દીધું હતું. સંસદ સભ્યપદ છોડનારાઓમાં મધ્યપ્રદેશના નરેન્દ્ર સિંહ તોમર, પ્રહલાદ સિંહ પટેલ, રાકેશ સિંહ, ઉદય પ્રતાપ અને રીતિ પાઠકનો સમાવેશ થાય છે. અરુણ સાઓ, રેણુકા સિંહ અને ગોમતી સાઈ છત્તીસગઢના છે જ્યારે રાજ્યવર્ધન સિંહ રાઠોડ, દિયા કુમારી અને કિરોરી લાલ મીના રાજસ્થાનના છે.
