મુંબઈ: કોવિડના વધતા જતા કેસોને ધ્યાનમાં રાખીને, મુંબઈ પોલીસે મુંબઈમાં આજથી 7 જાન્યુઆરી 2022 સુધી કલમ 144 લાગુ કરી છે. નવા COVID-19 પ્રતિબંધો મુજબ, નવા વર્ષની ઉજવણી, રેસ્ટોરાં, હોટલ, બાર, પબ, રિસોર્ટ અને ક્લબ સહિત કોઈપણ બંધ અથવા ખુલ્લી જગ્યામાં પાર્ટીઓ પર 30 ડિસેમ્બરથી 7 જાન્યુઆરી સુધી પ્રતિબંધ મૂકવામાં આવ્યો છે. આ આદેશનું ઉલ્લંઘન કરનાર કોઈપણ વ્યક્તિ ભારતીય દંડ સંહિતા 1860 ની કલમ 188 હેઠળ શિક્ષાને પાત્ર થશે ઉપરાંત રોગચાળાના રોગો અધિનિયમ 1897 અને રાષ્ટ્રીય આપત્તિ વ્યવસ્થાપન અધિનિયમ 2005 અને અન્ય કાનૂની જોગવાઈઓ હેઠળ દંડની જોગવાઈ કરવામાં આવી છે.
રાજ્યમાં બુધવારે નવા કોવિડ-19 કેસોમાં ઉછાળો જોવા મળ્યો હતો અને 3,900 કેસ નોંધાયા હતા, જેમાં ઓમિક્રોનના 85 કેસનો સમાવેશ થાય છે. દરમિયાન, મુંબઈમાં બુધવારે છેલ્લા 24 કલાકમાં 2,510 નવા COVID-19 કેસ અને એક મૃત્યુ નોંધાયા છે. હાલ મુંબઈમાં 8,060 સક્રિય કેસ છે. મુંબઈમાં કેસ અને રિકવરી રેટ 97 ટકા છે. હાલ મુંબઈમાં 45 ઈમારતો સીલ કરવામાં આવી છે. મહારાષ્ટ્રના કેબિનેટ મંત્રી આદિત્ય ઠાકરેએ પણ બૃહન્મુંબઈ મ્યુનિસિપલ કોર્પોરેશન (BMC)ના મુખ્યાલયમાં એક બેઠકની અધ્યક્ષતા કરી હતી.
