नवी दिल्ली : रशिया – युक्रेन संघर्षाचे साइड इफेक्ट आता जगातील अनेक देशांत दिसत आहेत. याची सुरुवात जगभरातील शेतकऱ्यांपासून झाली आहे. रशिया-युक्रेन युद्धामुळे शेतकऱ्यांना खतांसाठी संघर्ष करावा लागत आहे. भारतापासून ब्राझीलपर्यंत आणि दक्षिण आफ्रिकेपासून केनियापर्यंत हजारो मैल लांब राहणाऱ्या शेतकऱ्यांसाठी हे आव्हान समोर आले आहे. प्रचंड प्रमाणात खत टंचाईला सामोरे जावे लागत आहे.
याबाबत रॉयटर्समध्ये प्रकाशित वृत्तानुसार, रशिया आणि युक्रेन यांदरम्यानच्या संघर्षाने दुसऱ्या महिन्यात प्रवेश केला आहे. त्याचा प्रभाव जगभरातील शेतकऱ्यांवर दिसून येत आहे. रशिया आणि बेलारूसमधील प्रमुख मातीतील पोषक घटकांच्या आंतरराष्ट्रीय किमतींनी गेल्या महिन्यात विक्रमी उच्चांक गाठला. खतांच्या बाजारपेठेत रशिया जगातील सर्वात मोठा उत्पादक आणि निर्यातदार आहे. रशिया आणि बेलारुसने संयुक्तपणे गेल्या वर्षी पोटॅशमध्ये जागतिक निर्यातीत ४० टक्के योगदान दिले आहे. रशियावर पाश्चिमात्य देशांनी लावलेल्या निर्बंधांमुळे कच्चे तेल, नैसर्गिक गॅसच्या किमतीत वाढ झाली आहे. याशिवाय माल वाहतुक महागली आहे. विकसनशील देशातील शेतकऱ्यांचा खत पुरवठा आणि खर्च वाढला आहे.