ચંદીગઢ: કોંગ્રેસના વરિષ્ઠ નેતા ભૂપિન્દર સિંહ હુડ્ડાએ કોંગ્રેસ 2024માં હરિયાણામાં સત્તા પર આવશે તો સૌથી વધુ વૃદ્ધાવસ્થા પેન્શન, ગરીબોને જમીન, શેરડીનો ભાવ 450 રૂપિયા પ્રતિ ક્વિન્ટલ અને LPG સિલિન્ડર 500 રૂપિયા આપવાનું વચન આપ્યું છે. પૂર્વ મુખ્યમંત્રી હુડ્ડાએ યમુનાનગરના રાદૌર વિધાનસભા ક્ષેત્રમાં ‘જન આક્રોશ રેલી’ને સંબોધિત કરતી વખતે આ વચન આપ્યું હતું. તેમણે કહ્યું કે રાજ્યમાં પરિવર્તન નિશ્ચિત છે અને તેને કોઈ રોકી શકશે નહીં. લોકોએ 2024માં કોંગ્રેસની સરકાર લાવવાનું મન બનાવી લીધું છે. આ રેલી રાજ્યના તમામ 90 વિધાનસભા મતવિસ્તારોની મુલાકાત લેવાની હુડ્ડાની યોજનાનો એક ભાગ છે.
હુડ્ડાએ કહ્યું કે, 2005 થી 2014 ની વચ્ચે તત્કાલીન કોંગ્રેસ સરકારે શેરડીના ભાવ 117 રૂપિયાથી વધારીને 310 રૂપિયા પ્રતિ ક્વિન્ટલ કર્યા હતા. શેરડીના ભાવ વધારવાના નામે વર્તમાન સરકાર ક્યારેક 5 રૂપિયા તો ક્યારેક 10 રૂપિયા પ્રતિ ક્વિન્ટલનો વધારો કરે છે. તેમણે સવાલ કર્યો કે જ્યારે બજારમાં ખાંડ આટલી મોંઘી છે તો સરકાર શેરડીના ઓછામાં ઓછા 450 રૂપિયા પ્રતિ ક્વિન્ટલનો ભાવ કેમ નથી આપી રહી? હુડ્ડાએ કહ્યું કે, જો આવતા વર્ષે કોંગ્રેસ હરિયાણામાં સત્તામાં આવશે તો શેરડીનો ભાવ વર્તમાન રૂ. 372 થી વધારીને રૂ. 450 પ્રતિ ક્વિન્ટલ કરવામાં આવશે.
