ઈસ્લામાબાદ: રશિયાથી પાકિસ્તાનમાં ક્રૂડ ઓઈલની સીધી આયાત શરૂ થઈ ગઈ છે. રવિવારે રશિયાનું પહેલું ઓઇલ ટેન્કર સબસિડીવાળા ક્રૂડ ઓઇલ સાથે કરાચી પહોંચ્યું હતું. આ ટેન્કરમાં 45000 મેટ્રિક ટન ક્રૂડ ઓઈલ લોડ કરવામાં આવ્યું હતું. આ તેલ પાકિસ્તાની રિફાઈનરીઓને ટેસ્ટિંગ માટે આપવામાં આવ્યું છે. જો પરિણામ સંતોષકારક હોય તો પાકિસ્તાન રશિયા પાસેથી મોટી માત્રામાં ક્રૂડ ઓઈલ ખરીદી શકે છે. જો કે પાકિસ્તાન માટે ક્રૂડ ઓઈલના બદલામાં રશિયાને કરવામાં આવતી ચુકવણી સૌથી મોટી સમસ્યા છે. પાકિસ્તાન ઇચ્છે તો પણ રશિયાને ડોલરમાં ચૂકવણી કરી શકે તેમ નથી. એટલું જ નહીં તે ક્રેડિટ પર પણ રશિયા પાસેથી ક્રૂડ ઓઈલ ખરીદી શકતું નથી. આવી સ્થિતિમાં પાકિસ્તાન હાલમાં ચીનની કરન્સી યુઆનમાં રશિયાને ક્રૂડ ઓઈલ ચૂકવી રહ્યું હોવાનું બહાર આવ્યું છે.
પાકિસ્તાનના પેટ્રોલિયમ મંત્રી મુસાદિક મલિકે કહ્યું કે પાકિસ્તાને રશિયાને યુઆનમાં ચૂકવણી કરી છે. અમેરિકી ડોલરની અસરથી પેમેન્ટ પોલિસીમાં આ એક મોટો ફેરફાર માનવામાં આવે છે. પાકિસ્તાનનો વિદેશી હૂંડિયામણનો ભંડાર માંડ ચાર અઠવાડિયા સુધી આયાતની ચૂકવણી કરવા માટે પૂરતો છે. રશિયા સાથે કન્સેશનલ ઓઈલ ડીલની વિગતો જાહેર કર્યા વિના મુદાસીદ મલિકે કહ્યું હતું કે, પાકિસ્તાન દ્વારા રશિયા પાસેથી કન્સેશનલ ઓઈલની ખરીદી સરકાર-થી-સરકારની ડીલ છે. એપ્રિલમાં પ્રથમ બેચમાં રશિયાથી 100000 ટન ક્રૂડ ઓઇલની ખરીદી કરવામાં આવી છે, જેમાંથી 45000 ટન ક્રૂડ ઓઇલ કરાચી બંદરે પહોંચી ગયું છે અને બાકીનું રસ્તે છે.
પાકિસ્તાનને તેલના સપ્લાયથી રશિયાને દક્ષિણ એશિયામાં નવું બજાર મળ્યું છે. અત્યાર સુધી ભારત અને ચીન રશિયા પાસેથી સૌથી વધુ ક્રૂડ ઓઈલ ખરીદી રહ્યા છે. યુક્રેન યુદ્ધના કારણે પશ્ચિમી દેશોએ રશિયા પાસેથી તેલની આયાત પર પ્રતિબંધ લાદી દીધો છે. આવી સ્થિતિમાં રશિયાને તેનું ક્રૂડ ઓઈલ અન્ય દેશોને ઓછી કિંમતે વેચવાની ફરજ પડી રહી છે. વિશ્લેષકો કહે છે કે લાંબા સમયથી પશ્ચિમી સાથી અને પડોશી ભારતનો કટ્ટર હરીફ હોવા છતાં, પાકિસ્તાન રશિયા પાસેથી તેનું ક્રૂડ ઓઈલ મેળવી રહ્યું છે, જે ઐતિહાસિક રીતે ભારત સાથે સારા સંબંધો ધરાવે છે.
પાકિસ્તાની મંત્રીએ કહ્યું કે પાકિસ્તાન રિફાઈનરી લિમિટેડ (PRL) શરૂઆતમાં રશિયન ક્રૂડ ઓઈલને રિફાઈન કરશે. તેમણે રશિયા પાસેથી ખરીદેલ પ્રથમ શિપમેન્ટને નાણાકીય અને તકનીકી રીતે ટ્રાયર રન તરીકે ગણાવ્યું હતું. મલિકે સોમવારે તેમની રિફાઇનરીની ક્ષમતાઓ પર ઉઠાવવામાં આવતા પ્રશ્નોને ફગાવી દીધા હતા. તેમણે કહ્યું કે અમારી રિફાઈનરીઓ મધ્ય પૂર્વથી આવતા ક્રૂડ ઓઈલની સાથે રશિયન તેલને રિફાઈન કરવામાં સક્ષમ છે. તેમણે કહ્યું કે કોઈ પણ સંજોગોમાં ક્રૂડ ઓઈલના રિફાઈનિંગથી નુકસાન નહીં થાય.
