लाहोर : पंजाब शुगरकेन ग्रोअर्स असोसिएशन (PSGA) आणि पाकिस्तान शुगर मिल्स असोसिएशन (पंजाब क्षेत्र) यांनी संयुक्तपणे पाकिस्तानला परकीय चलन मिळविण्यासाठी अतिरिक्त साखरेच्या निर्यातीला परवानगी देण्याचे आवाहन पंतप्रधानांना केले आहे. साखर निर्यातीसाठी कायमस्वरूपी धोरण तयार करण्याच्या सूचना संबंधित मंत्रालयाला द्यावी, अशी मागणीही त्यांनी केली. शुक्रवारी पीएसएमए कार्यालयात झालेल्या दोन्ही संघटनांच्या बैठकीत उत्पादकांना भेडसावणाऱ्या समस्यांवर चर्चा करण्यात आली.
२०२२-२३ या गळीत हंगामात उत्पादकांना उसाची किमान आधारभूत किंमत ३०० रुपये प्रती टन मिळाली होती, तर २०२३-२४ मध्ये पंजाबमध्ये ४०० रुपये आणि सिंधमध्ये ४२५ रुपये प्रती टन हा दर निश्चित करण्यात आला होता. तो नंतर ५०० रुपये प्रती टनावर पोहोचल्याने शेतकऱ्यांना त्यांच्या पिकातून चांगला नफा मिळाला. अतिरिक्त साखरेच्या निर्यातीमुळे शेतकरी आणि साखर कारखानदारांमधील आर्थिक समस्या दूर होण्यास मदत होईल, असे सांगण्यात आले.
‘पीएसएमए’च्या अधिकाऱ्यांनी सांगितले की, साखरेचे दर घसरले आहेत आणि असोसिएशन अजूनही अतिरिक्त साखरेच्या निर्यातीच्या प्रतीक्षेत आहे. दुसरीकडे, निर्यात निर्णयातील अनावश्यक विलंबामुळे देशाच्या परकीय चलनाचा साठा वाढवण्याची संधी कमी होत असल्याने आंतरराष्ट्रीय साखरेच्या किमती सातत्याने घसरत आहेत. याबाबत, राणा इफ्तिखार मुहम्मद यांनी सांगितले की गहू, कापूस आणि मका यांसारख्या इतर पिकांमध्ये शेतकऱ्यांचे नुकसान झाले आहे. त्यांचा ऊस लागवडीकडे कल वाढत आहे. यंदा असा अंदाज आहे की, शेतकरी सुमारे ३० टक्के अधिक उसाची लागवड करतील. परिणामी पुढील हंगामात अतिरिक्त ऊस उत्पादन होईल. त्यानुसार अतिरिक्त साखरेचे उत्पादन पुन्हा वाढणार आहे.
