જલંધર/હોશિયારપુર: કેન્દ્રીય પ્રધાન નીતિન ગડકરીએ પંજાબમાં હોશિયારપુરમાં રૂ. 4,000 કરોડના મૂલ્યની 29 રાષ્ટ્રીય ધોરીમાર્ગ યોજનાઓનું ઉદ્ઘાટન અને શિલાન્યાસ કર્યો. પ્રોજેક્ટ્સમાં લુધિયાણામાં લાધોવાલ બાયપાસ, છ લેનનો ફ્લાયઓવર અને લુધિયાણામાં ટુ-લેન રોડ ઓવરબ્રિજ, જલંધર-કપૂરથલા સેક્શનને ચાર-માર્ગીય બનાવવા અને જલંધર-મખુ રોડ પર ત્રણ પુલનો સમાવેશ થાય છે. મંત્રી ગડકરીએ હોશિયારપુર-ફગવાડા રોડને ફોર-લેનિંગ અને ફિરોઝપુર બાયપાસને ફોર-લેનિંગ સહિત અનેક પ્રોજેક્ટનો શિલાન્યાસ કર્યો. તેમણે કહ્યું કે, રાજ્યના ખેડૂતોને ડ્રોનની સુવિધા આપવી જોઈએ અને રાજ્યને ગ્રીન હાઈડ્રોજનનું હબ બનાવવું જોઈએ. પંજાબના ખેડૂતોને સ્ટબલ ન બાળવા વિનંતી કરતા, તેમણે કહ્યું કે પાકના અવશેષોનો ઉપયોગ ઇથેનોલ, હાઇડ્રોજન અને કોમ્પ્રેસ્ડ નેચરલ ગેસ (CNG) ના ઉત્પાદનમાં ઇંધણ તરીકે વધુ ઉપયોગ માટે કરી શકાય છે.
સભાને સંબોધતા મંત્રી ગડકરીએ કહ્યું કે, વડાપ્રધાન નરેન્દ્ર મોદીના નેતૃત્વમાં ભાજપની આગેવાની હેઠળની સરકાર ગ્રીન એક્સપ્રેસ વે સહિત એક્સપ્રેસ વે બનાવી રહી છે, જે સ્થળો વચ્ચેનું અંતર ઘટાડવામાં મદદરૂપ થઈ રહી છે. રોડ ટ્રાન્સપોર્ટ અને હાઈવે મિનિસ્ટર ગડકરીએ વધુમાં જણાવ્યું હતું કે, પંજાબથી દિલ્હી, ચંદીગઢ, રાજસ્થાન, જમ્મુ અને કાશ્મીર, હિમાચલ પ્રદેશ અને હરિયાણા સુધી સારી કનેક્ટિવિટી માટે રૂ. 1.2 લાખ કરોડના ખર્ચે પાંચ ગ્રીનફિલ્ડ એક્સપ્રેસવે અને ઈકોનોમિક કોરિડોર બનાવવામાં આવી રહ્યા છે.
તેમણે 670 કિમી લાંબા ગ્રીનફિલ્ડ એક્સપ્રેસવે દિલ્હી-અમૃતસર-કટરા પ્રોજેક્ટ વિશે પણ વાત કરતા કહ્યું કે એકવાર આ પ્રોજેક્ટ પૂરો થઈ ગયા પછી, ચાર કલાકમાં દિલ્હીથી અમૃતસર અને છ કલાકમાં દિલ્હીથી કટરા પહોંચી શકાય છે.
