ચેન્નાઈઃ કેન્દ્ર સરકારની સાથે સાથે હવે રાજ્ય સરકાર પણ ઇથેનોલ ઉત્પાદન કરવા માટે આગળ આવી રહી છે અને ઘણા રાજ્યોએ તેમાં લીડ પણ લીધી છે. ઘણા રાજ્યોમાં ઈથેનોલ ઉત્પાદનને પ્રોત્સાહન આપવામાં આવી રહ્યું છે અને રાજ્યો તેને સફળ બનાવવા માટે નીતિઓ પણ બનાવી રહ્યા છે. હવે આ ક્રમમાં તમિલનાડુનું નામ પણ જોડાઈ ગયું છે. તમિલનાડુમાં પણ સરકારે ઇથેનોલના ઉત્પાદનને વેગ આપવા માટે એક પહેલ શરૂ કરી છે. તામિલનાડુ રાજ્યને પણ અનેક પ્રસ્તાવ મળી રહ્યા છે ત્યારે તામિલનાડુ સરકાર પણ આ મુદ્દે પોઝિટિવ બની છે.
તમિલનાડુ સરકારે જાહેરાત કરી છે કે ગ્રીન અને બ્લુ હાઇડ્રોજન અને ઇથેનોલ પોલિસી માટે નીતિ ઘડવામાં આવશે.આ ઇંધણ માંથી ભાવિ ઇંધણમાં સ્વિચ કરવાની કેન્દ્ર સરકારની પહેલને અનુરૂપ છે.
ધ ન્યૂ ઈન્ડિયન એક્સપ્રેસમાં છપાયેલા સમાચાર અનુસાર, સરકારી અધિકારીએ કહ્યું કે ઉદ્યોગ વિભાગ ગ્રીન હાઇડ્રોજન પર નીતિનો મુસદ્દો તૈયાર કરશે કારણ કે તમિલનાડુને રોકાણ માટે અનેક પ્રસ્તાવો મળી રહ્યા છે. આગામી પોલિસી ગ્રીન હાઇડ્રોજન પર થોડી સ્પષ્ટતા આપશે. કેન્દ્ર સરકારની નેશનલ ગ્રીન હાઇડ્રોજન પોલિસીનું લક્ષ્ય 2030 સુધીમાં 50 લાખ ટન ગ્રીન હાઇડ્રોજનનું ઉત્પાદન હાંસલ કરવાનો છે. ગ્રીન હાઇડ્રોજન એ હાઇડ્રોજન ગેસ છે જે પુનઃપ્રાપ્ય ઉર્જાનો ઉપયોગ કરીને પાણીના વિદ્યુત વિચ્છેદન દ્વારા ઉત્પન્ન થાય છે.
સ્થાનિક સ્તરે ઇથેનોલનું ઉત્પાદન કરવા અને તેને પેટ્રોલિયમ ઉત્પાદક કંપનીઓને વેચવા માટે ઇથેનોલ નીતિ પણ તૈયાર કરવામાં આવી રહી છે. નવી ઇથેનોલ નીતિ જૈવ ઇંધણ પરની રાષ્ટ્રીય નીતિની કેન્દ્રની સૂચનાને અનુરૂપ છે, જેમાં ઇથેનોલ બ્લેન્ડેડ પેટ્રોલ (EBP) પ્રોગ્રામ હેઠળ 2025 સુધીમાં પેટ્રોલમાં ઇથેનોલના 20% મિશ્રણનું સૂચક લક્ષ્ય છે.
