ભારતીય હવામાન વિભાગ (IMD) એ મંગળવારે જણાવ્યું હતું કે દક્ષિણ ભારતમાં નવેમ્બરમાં સામાન્ય કરતાં વધુ વરસાદ થવાની ધારણા છે. આ સમયગાળા દરમિયાન, લાંબા ગાળાની સરેરાશના 122 ટકાથી વધુ વરસાદની અપેક્ષા છે. આઇએમડીએ જણાવ્યું હતું કે, “નવેમ્બર માટેનો વરસાદ દક્ષિણ ભારતમાં (તટીય આંધ્ર પ્રદેશ, રાયલસીમા, તમિલનાડુ, પુડુચેરી, કેરળ અને દક્ષિણ આંતરિક કર્ણાટક)માં સામાન્ય કરતાં વધુ (લાંબા સમયગાળા ની સરેરાશના 122 ટકા કરતાં વધુ) રહેવાની ધારણા છે.”
1901 પછી મહિનામાં સૌથી વધુ વરસાદ
વર્ષ 1961-2010 દરમિયાન એકત્રિત કરવામાં આવેલા ડેટાના આધારે, નવેમ્બરમાં દક્ષિણ ભારતમાં લાંબા સમયગાળાની સરેરાશ (LPA) વરસાદ લગભગ 117.46 mm છે. તે જ સમયે, 25 ઓક્ટોબરથી શરૂ થયેલા પૂર્વોત્તર ચોમાસાને કારણે કેરળમાં ભારે વરસાદ થયો છે. રાજ્યમાં ઓક્ટોબરમાં 589.9 મીમી વરસાદ નોંધાયો હતો, જે 1901 પછીના મહિનામાં સૌથી વધુ છે.
11 નવેમ્બર સુધી વરસાદ ચાલુ રહેશે
IMDના ડાયરેક્ટર જનરલ મૃત્યુંજય મહાપાત્રાએ કહ્યું કે દક્ષિણ ભારતમાં, ખાસ કરીને કેરળમાં 11 નવેમ્બર સુધી વરસાદ ચાલુ રહેશે. તેમણે કહ્યું કે આ વર્ષે સપ્ટેમ્બર અને ઓક્ટોબર દરમિયાન દેશમાં અત્યંત ભારે વરસાદની 125 ઘટનાઓ નોંધાઈ છે, જે પાંચ વર્ષમાં સૌથી વધુ છે. તેની પાછળનું મુખ્ય કારણ દક્ષિણ પશ્ચિમ ચોમાસાનું મોડું પાછું ખેંચવું અને ઉપરની સામાન્ય લો પ્રેશર સિસ્ટમ છે.
સપ્ટેમ્બરમાં દેશમાં ભારે વરસાદ
IMDના ડેટા અનુસાર, સપ્ટેમ્બરમાં દેશમાં અત્યંત ભારે વરસાદની 89 ઘટનાઓ નોંધવામાં આવી હતી, જ્યારે ગયા વર્ષે સમાન મહિનામાં 61, 2019માં 59, 2018માં 44 અને 2017માં 29 ઘટનાઓ નોંધાઈ હતી. 2020માં સમાન સમયગાળામાં 10, 2019માં 16, 2018માં 17 અને 2017માં 12ની સરખામણીએ આ વર્ષે ઓક્ટોબરમાં આવી 36 ઘટનાઓ બની હતી.
