મુંબઇ સહિત મહારાષ્ટ્રના અનેક જિલ્લાઓમાં અવિરત વરસાદને કારણે પૂર જેવી સ્થિતિ છે. ઘણી નદીઓ પણ જોખમનાં ચિન્હથી ઉપર વહી રહી છે. કોંકણ ક્ષેત્રના રાયગઢ અને રત્નાગીરી જિલ્લા વરસાદ અને પૂરના કારણે સૌથી વધુ અસરગ્રસ્ત છે. સમગ્ર રાજ્યમાં અત્યાર સુધીમાં 8 લોકોના મોત નોંધાયા છે. સ્થાનિક વહીવટ ઉપરાંત એનડીઆરએફ અને એરફોર્સની ટીમ પણ બચાવ કામગીરી માટે તૈનાત કરવામાં આવી છે. પૂરને કારણે અનેક રૂટો પર ટ્રેન સેવાઓ પણ રદ કરવામાં આવી છે. તે જ સમયે, પૂણે સ્થિત 12 જ્યોતિર્લિંગમાંનું એક ભીમાશંકર ગર્ભગૃહમાં પાણી પ્રવેશ્યું છે. મુંબઈના ગોવંડી વિસ્તારમાં મકાન ધરાશાયી થતાં 3 લોકોનાં મોત નીપજ્યાં છે જ્યારે 7 લોકો ઘાયલ હોવાનું કહેવાઈ રહ્યું છે.
દરમિયાન વડા પ્રધાન નરેન્દ્ર મોદીએ મહારાષ્ટ્રના મુખ્યમંત્રી ઉદ્ધવ ઠાકરે સાથે વાત કરીને વરસાદ અંગે માહિતી મેળવી હતી અને તમામ મદદ કરવાની ખાતરી આપી હતી અનેક લેન્ડ સ્લાઈડ ની ઘટના પણ સામે આવી છે અને તેમાં અનેક ના મોટ થયાના સમાચાર મળી રહ્યા છે.
હવામાન વિભાગ દ્વારા શક્ય ભારે વરસાદની ચેતવણીને ધ્યાનમાં રાખીને મુંબઇ ટ્રાફિક પોલીસ એલર્ટ મોડ પર છે. શહેરમાં ટ્રાફિક નો સરળ પ્રવાહ આવે તે માટે પોલીસ બંદોબસ્તની વધારાની વ્યવસ્થા પણ કરવામાં આવી છે.
સૂત્રોના જણાવ્યા અનુસાર શહેરના મુખ્ય પાણી ભરેલા સ્થળોએ ટ્રાફિક પોલીસની વધારાની તહેનાત રહેશે, જ્યારે વેસ્ટર્ન એક્સપ્રેસ હાઇવે, ઇસ્ટર્ન એક્સપ્રેસ હાઇવે, જેવીએલઆર, એસવીએલઆર, લિન્ક રોડ અને એસવી રોડ જેવા મહત્વના માર્ગો પર સીસીટીવી સર્વેલન્સ કરવામાં આવી રહી છે. સાંજે સાઉથ મુંબઇથી મુંબઇ આવતી ટ્રેનો પર અને સવારે મુંબઇથી સાઉથ મુંબઇ જતા રૂટ ઉપર વધારાની તકેદારી રાખવામાં આવી રહી છે.
હેલ્પલાઈન સુવિધા શરૂ કરી
કટોકટીની સ્થિતિમાં, હેલ્પલાઇન નંબર પર એસએમએસ અને કોલ સુવિધા ઉપલબ્ધ છે. આ દ્વારા પોલીસની મદદ લઈ શકાય છે. જો કે ડીસીપી (ટ્રાફિક પોલીસ) સોમનાથ ખાર્ગે લોકોને અકારણ ઘરની બહાર ન આવવાની અપીલ કરી છે.
