ચંદીગઢ: ખેડૂત વિરોધી કાયદા આંદોલન દરમિયાન માર્યા ગયેલા લોકોના પરિજનોને કૃષિ લોનની સંપૂર્ણ માફી અને વળતરની માંગ સાથે, ખેડૂતોએ 21 ડિસેમ્બર, 2021 ના રોજ બીજા દિવસે પંજાબમાં વિવિધ સ્થળોએ રેલ ટ્રેક બ્લોક કર્યા, જેના કારણે 156 જેટલી ટ્રેન પ્રભાવિત થઇ હતી ડિવિઝનના રેલ્વે અધિકારીઓના જણાવ્યા અનુસાર, 84 ટ્રેનો રદ કરવામાં આવી હતી, અને 47 ટ્રેન ટર્મિનેટ કરવામાં આવી હતી.
કિસાન મજદૂર સંઘર્ષ સમિતિના બેનર હેઠળ આંદોલન શરૂ કરીને, ખેડૂતોએ સોમવારે સંપૂર્ણ લોન માફી, વર્ષભરના કૃષિ વિરોધી કાયદાઓ દરમિયાન માર્યા ગયેલા પરિવારોને વળતર અને તેમની સામે નોંધાયેલા ફોજદારી કેસ પાછા ખેંચવાની માંગ કરી હતી. આંદોલનકારીઓ નુકસાન પામેલા પાક માટે પ્રતિ એકર રૂ. 50,000નું વળતર, શેરડીના પાક માટે બાકી રકમ મુક્ત કરવા અને કોન્ટ્રાક્ટ સિસ્ટમનો અંત લાવવાની પણ માંગ કરી રહ્યા છે. ફિરોઝપુર, તરનતારન, અમૃતસર અને હોશિયારપુરમાં ખેડૂતો હાલમાં રેલવે ટ્રેક પર બેસીને વિરોધ દર્શાવી રહ્યા છે.
