नवी दिल्ली : एप्रिल ते जून या कालावधीत देशातील बहुतांश भागात कमाल तापमान सामान्यपेक्षा जास्त राहण्याची तसेच विविध भागांमध्ये 10-20 दिवस उष्णतेच्या लाट येण्याची शक्यता आहे, असे भारतीय हवामान विभागाने (IMD) म्हटले आहे. ‘आयएमडी’चे संचालक मृत्युंजय महापात्रा यांनी पत्रकार परिषदेत सांगितले की, एप्रिल महिन्यात देशभरात सामान्य पाऊसही अपेक्षित आहे.
महापात्रा म्हणाले, देशाच्या बहुतांश भागांमध्ये, विशेषत: मध्य भारत आणि पश्चिम द्वीपकल्पीय भारतामध्ये कमाल तापमान सामान्यपेक्षा जास्त राहण्याची शक्यता आहे. पश्चिम हिमालयीन प्रदेशातील काही भाग, उत्तर-पूर्व राज्ये आणि उत्तर ओडिशामध्ये तापमान सामान्यपेक्षा कमी राहण्याची शक्यता आहे. उष्णतेच्या लाटेबद्दल महापात्रा म्हणाले की, देशातील बहुतांश मैदानी भागात उष्णतेच्या लाटेचे दिवस सामान्यपेक्षा जास्त राहण्याची शक्यता आहे. विविध भागात 10 ते 20 दिवस उष्णतेची लाट राहण्याची शक्यता आहे, तर साधारणपणे 4 ते 8 दिवस उष्णतेची लाट राहण्याची शक्यता आहे.
गुजरात, मध्य प्रदेश, महाराष्ट्र आणि उत्तर कर्नाटक, राजस्थान मध्य प्रदेश आणि उत्तर छत्तीसगड, ओडिशा, आंध्र प्रदेश या प्रदेशांमध्ये उष्णता वाढण्याची शक्यता आहे. IMD नुसार यासाठी, जर एखाद्या स्टेशनचे कमाल तापमान मैदानी भागासाठी किमान 40 °C किंवा त्याहून अधिक आणि डोंगराळ भागात किमान 30 °C किंवा त्याहून अधिक पोहोचले, तर ‘उष्णतेची लाट’ मानली जाते.
IMD महासंचालक महापात्रा म्हणाले, पाऊस देशभरात एप्रिल महिन्यात सामान्य (88-112 टक्के एलपीए) राहण्याची शक्यता आहे. 1971 ते 2020 या एप्रिल महिन्यात देशभरात दीर्घकालीन सरासरी (LPA) पाऊस सुमारे 39.2 मिमी आहे. उत्तर पश्चिम भारताच्या बहुतांश भागांमध्ये आणि मध्य आणि उत्तर द्वीपकल्पीय भारताच्या काही भागात सामान्य ते सामान्यपेक्षा जास्त पाऊस पडण्याची शक्यता आहे. पूर्व आणि पश्चिम किनारपट्टी, पूर्व आणि ईशान्य भारत, दक्षिण द्वीपकल्पीय भारताच्या काही भागात सामान्यपेक्षा कमी पाऊस पडण्याची शक्यता आहे.
