अंबाला : येथील जाटवाड गावातील इथेनॉल कारखान्याच्या दोन बॉयलरला अचानक आग लागली. बॉयलरला गुरुवारी लागलेल्या या भीषण आगीत सुदैवाने कोणीही जखमी झाले नाही, असे अधिकाऱ्यांनी सांगितले. अंबाला कँट अग्निशमन केंद्राचे अग्निशमन अधिकारी, प्रमोद कुमार यांनी सांगितले की, नारायणगडजवळ असलेल्या या कारखान्यातील आग आटोक्यात आणण्यासाठी अंबाला कँट, अंबाला शहर, नारायणगड आणि बारवाला येथून 10 हून अधिक अग्निशामक दलांना पाचारण करण्यात आले होते. आगीचे कारण अद्याप समजू शकले नसल्याचे त्यांनी सांगितले. या प्रकरणाची चौकशी करण्यात येणार असून कारखान्याच्या आग विझवण्याच्या व्यवस्थेचीही चौकशी करण्यात येणार आहे. या आगीत नेमके किती नुकसान झाले, याबाबत अद्याप कोणतीही माहिती मिळालेली नाही.
