ऊस तोडणी यंत्र खरेदीसाठी महाराष्ट्र सरकार करणार साखर उद्योगाला मदत

मुंबई : साखर उद्योगाला एक मोठा दिलासा देताना मुख्यमंत्री एकनाथ शिंदे यांनी राज्य सरकार जवळपास ९०० हार्वेस्टर खरेदीसाठी पूर्णपणे मदत करेल अशी घोषणा केली. शिंदे हे पुण्यातील वसंतदादा शुगर इन्स्टिट्यूटच्या ४६ व्या वार्षिक सर्वसाधारण सभेत बोलत होते. साखर उद्योगाकडून खास करुन ऊस तोडणीसाठी मजुरांच्या टंचाईमुळे आणि तोडणीसाठी येत असलेल्या जादा खर्चामुळे हार्वेस्टरची मागणी वाढली आहे.

मुख्यमंत्री शिंदे म्हणाले की, सरकारने नेहमीच साखर कारखान्यांना पाठबळ दिले आहे. सरकार भविष्यातही साखर कारखान्यांसमोर येणाऱ्या अडचणी दूर करण्यासाठी प्रयत्न करेल. सरकारने साखर उद्योगासोबतच शेतकऱ्यांसमोरील मुलभूत समस्या दूर करण्याचा प्रयत्न केला आहे. शिंदे म्हणाले की, शेतकऱ्यांच्या समस्या सोडविताना १८ सिंचन योजनांचा प्रारंभ करण्यात येत आहे. यामधून जवळपास अडीच लाख हेक्टरवर सिंचन होणार आहे.

मुख्यमंत्री एकनाथ शिंदे यांनी सांगितले की, इथेनॉल उत्पादनाला राज्य सरकार प्रोत्साहन देणार आहे. सरकारचे धोरण इथेनॉल उत्पादनाला चालना देण्याचे असून त्यामुळे साखर उद्योगाला चालना मिळेल. राज्यात १०६ कारखान्यांनी इथेनॉलचे उत्पादन सुरू केले आहे.

मुख्यमंत्री शिंदे म्हणाले, राज्यात साखरेचे अतिरिक्त उत्पादन होत असून, कारखान्यांनी साखरेची निर्यात व्यवस्थापित करून इतर राज्यांना साखर विक्री करण्यावर भर द्यावा. शेतकऱ्यांनी उसाव्यतिरिक्त बागायती विकास आणि कापूस व सोयाबीन लागवड वाढवण्यावरही भर दिला पाहिजे, असे ते म्हणाले. उसासाठी ठिबक सिंचनाचा वापर वाढवण्यासाठी राज्य सरकार प्रयत्नशील आहे. त्यामुळे कमी क्षेत्रात आणि कमी पाण्यात साखर कारखान्यांना ऊस देणे शक्य होणार आहे.

LEAVE A REPLY

Please enter your comment!
Please enter your name here